Сурхондарёда тўй кортежида қарама-қарши йўналишда ҳаракатланган «Lacetti» ҳайдовчисига чора кўрилди — видео
Шунингдек, йўловчи ҳаракат давомида люкдан бошини чиқариб, ҳолатни видеога олган
Сурхондарё вилояти Термиз шаҳрида тўй кортежида қарама-қарши йўналишда ҳаракатланган «Lacetti» ҳайдовчисига чора кўрилди. Бу ҳақда вилоят Ички ишлар бошқармаси ахборот хизмати хабар берди.
Унга кўра, воқеа шаҳарнинг Саловат маҳалласи ҳудудидан ўтувчи йўлда содир этилган. Аниқланишича, давлат рақами 75 101 VAA бўлган «Lacetti» русумли автомашина ҳайдовчиси қарама-қарши йўналишда ҳаракатланган. Шунингдек, у машинанинг том қисмидан йўловчисини чиқариб, ҳолатни видеога олиб, уни ижтимоий тармоқларга жойлаштирган.
Мазкур ҳолат юзасидан автомобиль вақтинча жарима майдончасига қўйилиб, маъмурий баённома тузилган.
Аввалроқ Тошкентда қарама-қарши йўлда ҳаракатланган автоблогерга жарима ёзмаган йўл-патруль хизмати ходимига чора кўрилгани маълум қилинган. Шунингдек, Бухорода қарама-қарши йўналишда ҳаракатланган ҳайдовчилар жаримага тортилгани хабар қилинган.
