Самарқанд вилояти Пахтачи туманида «Ички ишлар бошқармаси ходимлари вояга етмаган болани сўроқ қилишди» сарлавҳаси остида видеолавҳа тарқалганди. Бу бўйича вилоят Ички ишлар бошқармаси ахборот хизмати муносабат билдирди.

Маълум қилинишича, 25 май куни соат 20:30 лар атрофида туман Ички ишлар бошқармаси ходимлари ҳамда бошқа ҳуқуқни муҳофаза қилувчи органлар томонидан, Зиёвуддин шаҳарчасида жойлашган «Хўжа Зиёвуддин» жоме масжиди кўздан кечирилган. Махсус диний маълумотга эга бўлмаган Х.А. исмли шахс 11 нафар (5 нафари вояга етмаган) шахсларга диний ташкилот бошқаруви марказий органининг рухсатисиз, диний таълимотдан сабоқ бераётгани аниқланган.

Ҳолат юзасидан Х.А.га нисбатан Маъмурий жавобгарлик тўғрисидаги кодекснинг 241-моддаси (Хусусий мулк ҳуқуқини бузиш) билан маъмурий баённома расмийлаштирилиб, келгусида диний таълимотлардан сабоқ бериш нияти бўлса, махсус диний билимларни эгаллаб, қонунларга асосан, ваколатли диний органларнинг рухсати асосида фаолият кўрсатиши мумкинлиги тушунтирилган.

Аввалроқ Андижонда ҳеч қандай рухсатномасиз диний сабоқ бериб келаётган шахс ушлангани хабар қилинганди. Шунингдек, Ўзбекистонда диний мазмундаги материалларни ноқонуний тайёрлаш, сақлаш ёки тарқатиш жиноят қонунчилигидан чиқарилиши маълум қилинган.