Ўзбекистонда минимал истеъмол харажатларининг давлат бюджетига таъсири маълум қилинди
АОКАда 31 май, душанба куни ўтказилган матбуот анжуманида Молия вазири ўринбосари Жамшид Абруев Ўзбекистонда минимал истеъмол харажатлари қийматини белгилашнинг давлат бюджетига таъсири ҳақида маълумот берди. Бу ҳақда анжуманда иштирок этган «Bugun.uz» мухбири хабар қилди.
Молия вазири ўринбосари Жамшид Абруевнинг таъкидлашича, минимал истеъмол харажатлари миқдорининг белгиланиши, ўз навбатида, давлат бюджети ҳамда ижтимоий ҳимояга муҳтож аҳоли қатламга берилаётган моддий ёрдамга таъсир кўрсатади. Чунки ушбу кўрсаткичнинг эълон қилиши давлатнинг маълум бир ижтимоий масъулиятларни олишига мажбур қилади.
«Биринчидан, пенсия пуллари, турли кўринишдаги нафақа пуллари хатловдан ўтказилиб, эълон қилинган минимал истеъмол харажатларига мувофиқлаштирилади. Иккинчидан, минимал истеъмол харажатлари — аҳолига турли кўринишдаги ижтимоий ёрдамлар кўрсатишда мезон сифатида белгиланиши назарда тутилмоқда», — деди Жамшид Абруев.
Мавзуга доир:
Эслатиб ўтамиз, аввалроқ Ўзбекистонда аҳолини ижтимоий ҳимоя қилиш миллий стратегияси ишлаб чиқилиши ҳақида хабар берилган.
