АҚШнинг собиқ президенти Дональд Трамп Американинг амалдаги етакчиси Жо Байденнинг сиёсатини кескин танқид қилиб, у мамлакатни «йўқ қилаётганини» таъкидлади. Бу ҳақда «Daily Mail» хабар берди.

Маълум қилинишича, навбатдаги мурожаатида Трамп янги маъмуриятнинг Хитой, Яқин Шарқ билан муносабатидан ҳамда Қўшма Штатларнинг жанубий чегарасидаги муаммоларни ҳал қилиш услубидан норози эканини таъкидлаган.

Сиёсатчининг сўзларига кўра, президентлиги даврида у ушбу масалаларнинг барчасини ҳал қилган, аммо Байден ҳамма нарсани йўқ қилган.

«Агар у ҳеч нарса қилмаганида, ҳозир тарихдаги энг мустаҳкам чегарага эга бўларди. Мен Гватемала, Гондурас, Сальвадор, Мексика каби бошқа давлатлар билан ўртамиздаги масалаларнинг ҳаммасини ҳал қилган эдим. Байдендан кутилгани эса фақат ҳеч нарса қилмаслик эди», — дея қайд этган Трамп.

Шунингдек, у бир қатор иммиграция дастурларининг бекор қилинишини қоралаган. Хусусан, бошпана сўрайдиганларнинг ўз мамлакатларидаги тегишли суд жараёни хулосасини кутиши кераклигини кўзда тутувчи дастур ўз вақтида Мексика чегарасида гиёҳванд моддалар ва одам савдосининг амалда йўқ бўлишига олиб келганини айтган.

«Биз ҳайратланарли ишларни қилдик, энди эса сиз ҳозир нима бўлаётганини кўринг. Улар мамлакатга қамоқхоналардан чиққан одамларни киритмоқда. Уларнинг орасида қотиллар, гиёҳванд моддалар ва одам савдоси билан шуғулланганлар бор», — дея қайд этган республикачи.

Трамп, шунингдек, Байденнинг Шимолий Кореяга муносабатини ҳам танқид қилиб, унинг Ким Чен Ин билан жуда яхши муносабатлари Осиё мамлакатидан келиб чиқадиган ядровий таҳдиднинг олдини олишига ёрдам берганини айтган.

Аввалроқ Трамп Исроилдаги кескинликда Байденни айблаган. Шунингдек, уни Байденнинг ғалабасидан кўра кўпроқ Twitter’даги саҳифасининг блокланиши хафа қилгани маълум бўлганди.