Мудофаа саноати қўмитаси «Тарлон» енгил зирҳланган автомобили синовларини якунлади. Бу ҳақда қўмита ахборот хизмати хабар берди.

Хабарга кўра, синовлар турли иқлим ва жой шароитларида амалга оширилган. Синов жараёнида зирҳли автомобилнинг енгил ва хавфсиз бошқарилиши, баландликларга кўтарилиш ва тушиш, ўтиш қийин бўлган жойларда ҳаракатланиши, максимал тезлиги, табиий ва сунъий тўсиқлардан ўтиши, ёқилғи-мой маҳсулотлари сарфи, тормозланиш йўлаги ва бошқа муҳим кўрсаткичлари текширилган. Синов натижалари машинани белгиланган талаблар ва давлат стандарт меъёрларига жавоб беришини кўрсатди.

Шунингдек, идоралараро комиссия аъзолари томонидан автомобилнинг жанговар ва техник кўрсаткичларини яхшилаш бўйича қатор таклиф ва тавсиялар киритилган. Ушбу таклифлар асосида киритилган ўзгартиришлардан сўнг автомобилни қўшинлар таркибидаги иккинчи босқич синовидан ўтказиш режалаштирилган.

Эслатиб ўтамиз, 19 май куни Мудофаа саноати қўмитаси Ўзбекистонда ишлаб чиқарилган «Тарлон» номли енгил зирҳланган автомобилни синовдан ўтказгани хабар қилинган.