Фарғона вилоятида Хитойнинг «Liaoning Lide» компанияси томонидан 1200 мегаватт бўлган қуёш электр станциясини барпо этилади. Бу ҳақда «Yuz.uz» хабар берди.

Хабарга кўра, мазкур масала вилоят ҳокими Хайрулло Бозоров Хитойнинг «Liaoning Lide» компаниясини қабул қилганида муҳокама этилган.

Маълум бўлишича, компания бошқарув кенгаши раиси ўринбосари Чжан Цзинминь лойиҳалар департаменти раҳбари Сяо Чунхунь ҳамда Ўзбекистон филиали директори Чжоу Жунькан билан бўлган мулоқотда Хитой компанияси томонидан вилоят ҳудудида лойиҳа тахминий қиймати 700 миллион долларга тенг бўлган, қуввати 1200 мегаваттгача бўлган йирик қуёш электр станциясини қурилиши айтилган. Шунингдек, мулоқотда дунёда анъанавий энергия ресурслари чекланган бугунги шароитда ва келажакда ушбу лойиҳанинг Фарғона вилояти учун муҳим ўрин тутиши қайд этилган.

Бир неча ойдан бери давом этаётган музокаралар якуний босқичга ўтгани, вилоят ҳокимлиги томонидан лойиҳани амалга ошириш учун тақдим этилган ер майдонлари ҳудудида сўнгги техник тадқиқотлар ўтказилаётгани, яқин кунларда ушбу ишлар якунланиб, лойиҳанинг аниқ қуввати ҳамда қиймати белгиланиши маълум қилинган. Шу билан бирга, Энергетика вазирлиги, вилоят ҳокимлиги ҳамда компания ўртасида меморандум имзоланиши режа қилинган.

Шунингдек, ҳозирда БААнинг «Masdar», Франциянинг «Total Eren» компаниялари томонидан Навоий ва Самарқандда ҳар бирининг қуввати 100 мегаватт бўлган қуёш фотоэлектр станциялари қуришга киришилганини айтилган. Вилоят ҳокими Фарғонада амалга оширилиши режалаштирилган лойиҳада киловатт/соат электр энергияси нархи «Masdar» ва «Total Eren» томонидан таклиф этилган тарифлар атрофида бўлиши кераклини таъкидлаган.

Хитойлик меҳмонлар Фарғона водийсидаги қайта тикланадиган энергетиканинг биринчи лойиҳаси учун банк кредитлари эмас, тўғридан-тўғри инвестициялар жалб этиш режалаштирилганини маълум қилган. Қолаверса, инвесторлар ишлаб чиқарилган электр энергиясини 25 йил муддатда сотиб олиши учун «Ўзбекистон миллий электр тармоқлари»га мақбул тарифларни тақдим этишга тайёр эканини билдирган.

Аввалроқ Ўзбекистоннинг икки вилоятида қуёш электр станцияларини қуриш учун инвесторлар аниқлангани хабар қилинган. Шунингдек, Ўзбекистонда илк қуёш электростанциясини молиялаштириш бўйича шартномалар имзолангани маълум қилинган.