Жаҳон соғлиқни сақлаш ташкилоти (ЖССТ) коронавирус пандемияси сабабли ўрнатилган чекловларни бекор қилиш эмланмаганлар учун хавфли бўлиши мумкинлиги айтди. Бу ҳақда ташкилот раҳбари Тедрос Аданом Гебрейесусга таяниб, «РИА Новости» хабар берди.

Маълум қилинишича, ташкилот раҳбари 7 июнь, душанба куни бўлиб ўтган брифингда бу бўйича махсус баёнот берди.

«Коронавирус штаммларининг жумладан «ҳиндча» вариантни глобал миқёсда тарқалиши сабабли ўрнатилган чекловларни тезда бекор қилиш эмланмаганлар орасида жиддий хавфни юзага келтиради», — деган Гебрейсус.

У шунингдек, COVID-19 вакциналарининг нотекис тақсимланиши вируснинг тарқалишига имкон бериши, бу эса эмлаш самарадорлигини пасайтирадиган коронавирус вариантининг кўпайишига туртки бўлишини айтган.

Эслатиб ўтамиз, Жаҳон соғлиқни сақлаш ташкилоти коронавирусни тўлиқ йўқ қилиш асосий ечим эмаслиги ва инсоният бунга кўникиши кераклигини маълум қилганди. Шунингдек, ташкилот дунё бўйлаб 2021 йил охиригача қанча аҳоли эмланиши кераклигини айтган.

Аввалроқ ЖССТ коронавирусга қарши навбатдаги вакцинани фавқулодда қўллашни тасдиқлаганди. Шу билан бирга, ташкилот коронавирус штаммлари номига ўзгартириш киритганди.