АҚШнинг собиқ президенти Дональд Трамп Twitter ва Facebook’ни сўз эркинлигига тўсқинлик қилишда айблаб, қўп давлатларни ушбу тармоқларни блоклашга чақирди. Бу ҳақда «Tech Chrunch» хабар берди.

Келтирилишича, Оқ уйнинг собиқ раҳбари 9 июнь куни Нигерияни Twitter’ни блоклагани учун табриклаб, кўп мамлакатлар ҳам бунга эргашиши кераклигини айтди.

«Улар ким бўлибдики, ўзлари соф ёвузлик қила туриб, нима яхши ва нима ёмонлигини белгилайди? Мен буни президент бўлганимда қилишим керак эди. Аммо Цукерберг (Facebook асосчиси) менга қўнғироқ қилиб, Оқ уйга кечки овқатга келиб, менга қанчалик яхши эканимни таъкидлади», — дейилган Трамп баёнотида.

Таъкидланишича, баёнот сўнгида собиқ президент АҚШ президентлик сайловига ишора қилиб, «2024?» деб ёзган.

Маълумот ўрнида, Трамп 6 июнь куни Facebook раҳбари Марк Цукербергни сўз эркинлиги тўғрисидаги қонунларни бузганликда айблаб, шахсий аккаунтининг ижтимоий тармоқда музлатилганини танқид қилган. Блокланишга Трамп тарафдорларининг Капитолий биносига қилган ҳужуми сабаб бўлган. Шундан сўнг Facebook Трампни нафратни қўзғатишда айблаб, тармоқдаги саҳифасини икки йилга блоклаган.

Аввалроқ Трамп доллар «дунё валютаси»га айланиши кераклигини айтганди. Шунингдек, Трамп Байденнинг сиёсатини кескин танқид қилганди.