Фарғона туманида эркак 9 йиллик алимент пулини муддатидан олдин тўлади. Бу ҳақда Мажбурий ижро бюроси Фарғона вилояти бошқармаси ахборот хизмати хабар берди.

Маълум бўлишича, Мажбурий ижро бюроси Фарғона туман бўлими иш юритувида қарздор А.С.дан ундирувчи М.М. фойдасига бир нафар вояга етмаган фарзанди учун алимент ундириш ҳақидаги ижро ҳужжати мавжуд. Ҳужжат бўйича қарздордан алимент қарзи мунтазам равишда ўз вақтида ундириб келингани сабаб ундирувчи М.М. томонидан эътироз келиб тушмаган.

Таъкидланишича, алимент пулини тўлаш учун келган С.А.га давлат ижрочиси томонидан Вазирлар Маҳкамасининг «Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномасини тузиш тартиби тўғрисида»ги низом талаблари тушунтирилган.

Шундан сўнг 9 июнь куни эркак фарзанди Р.М.нинг 18 ёшга тўлгунга қадар ҳисобланган 71 миллион сўм алимент пулининг 3000 долларини нақд кўринишда, қолган 40 миллион сўм пулни банк пластик картасига ўтказган ҳолда берган. Шу тарзда ундирувчи М.М.нинг аризасига ижро иши бўйича иш юритуви тамомланиб, ҳужжат унга қайтарилган.

Аввалроқ Бухорода ота фарзанди учун 2500 доллар алимент тўлагани хабар қилинган. Шунингдек, Сурхондарёда ота фарзандларига алимент ўрнига 2 хонали уй ва 10 сотих ер бергани маълум қилинган.