Россиянинг Москва ҳамда Тверь шаҳарларига 33 нафар ўзбекистонлик ишлаш учун жўнаб кетди. Бу ҳақда Ташқи меҳнат миграцияси агентлиги ахборот хизмати хабар берди.

Маълум бўлишича, Россиянинг «Тех Строй» корхонаси билан имзоланган келишувга мувофиқ вилоятларда ўтказилган танловларда иштирок этиб, тиббий кўриклардан муваффақиятли ўтган 15 нафар фуқаро Москва шаҳрида вақтинча меҳат фаолиятини амалга ошириш учун Тошкент–Москва авиарейси орқали жўнаб кетган.

Шунингдек, Бухоро вилоятидан 18 нафар фуқаро Тверь шаҳридаги «Твест-М» корхонасининг қурилиш объектларида ишлаш учун юборилгани айтилган. Меҳнат мигрантлари ҳуқуқ ва манфаатларини ҳимоя қилиш юзасидан тарқатма материаллар берилди. Шу билан бирга, июнь ойида Россияга 267 нафар фуқаро вақтинча меҳат фаолиятини амалга ошириш учун жўнатилгани маълум қилинган.

Аввалроқ Қозоғистонга 62 нафар ўзбекистонлик ишлаш учун жўнаб кетгани хабар қилинган. Россиядан Ўзбекистонга мигрантларни ташиш учун қўшимча поезд йўлга қўйилгани маълум қилинган.