Сирдарё вилояти Гулистон шаҳрида ўғлини 3 минг долларга сотмоқчи бўлган аёлга суд ҳукми ўқилди. Бу ҳақда «Sirdaryo xabarlari» маълум қилди. 

Маълум қилинишича, 2021 йил 25 февраль куни соат 12:00 ларда Гулистон шаҳар Намуна маҳалласида жойлашган Никоҳ уйи рўпарасидаги автотураргоҳда навоийлик С.И. ўзининг ўғли Б.ни тезкор тадбирга харидор сифатида жалб этилган вилоят ИИБ ходими Б.Д.га 3 минг долларга сотишга келишган. Болани унга топшириб, олдиндан келишилган 3000 доллар миқдордаги пулларни олган вақтида ашёвий далиллар билан қўлга олинган.

С.И. суд мажлисида қилмишидан пушаймонлигини билдириб, қонуний енгиллик сўраган. Суд барча ҳолатларни инобатга олиб, унга тегишли қонуний жазони тайинлаган. Шунингдек, чақалоқ васийлик органларига топширилган.

Аввалроқ Сурхондарёда 1 ёшли қизини сотаётган аёл ушлангани хабар қилинганди. Шунингдек, Қашқадарёда 4 ёшли ўғлини сотмоқчи бўлган аёл ва унинг шериги қўлга олингани маълум қилинган.