АОКАда 14 июнь, душанба куни Агросаноат мажмуи устидан назорат қилиш инспекцияси вакиллари иштирокида ўтказилган матбуот анжуманида Ўзбекистонда 2021 йил учун ғалла ўримига 3500 га яқин комбайн жалб қилиниши маълум қилинди. Бу ҳақда «Bugun.uz» мухбири хабар берди.

«Ўзагроинспекция» бошқарма бошлиғи ўринбосари Шавкат Равшановга кўра, 2021 йилда 1 миллион 38 минг гектар майдонга ғалла экилган. Ғалла пишиб етилиб, ўримда 3500 яқин комбайн иштирок этяпти.

«Комбайнларни таъмирлаш сифати қаттиқ назоратга олинди. Ҳозир ўртача 3,5 мингга яқин комбайн ишлаб турган бўлса, фақатгина Қорақалпоғистон ва Хоразмда ўрим энди бошланади. Қолган вилоятларда ўрим жараёнлари олиб борилмоқда. Ўртача ҳосилдорлик гектарига 47–50 центнер бўлиб турибди. Ҳар бир комбайн билан 12–15 гектар ер ўрилмоқда. 50 тонна атрофида дон ўриб олинмоқда», — деди Шавкат Равшанов.

У, шунингдек, комбайнларнинг ҳар бирини 30 миллиондан ошмаган ҳолда таъмирлаш кўзда тутилганини айтди. Сабаби 3500 та комбайннинг 1500 таси охирги 5 йилда харид қилинган.

«Деярли 70 фоиз комбайн хизмат муддатини ҳали ўтмаган 7 йилгача бўлган комбайнлардир. Уруғлик ғаллани ўриб олишга охирги 2 йиллик комбайнлардан фойдаланилди. Таъмирлаш хизмати етарлича, ҳар йилга нисбатан бу йил яхши. Ҳар бир комбайнга 4 тадан транспорт воситаси бириктирилди», — деди бошқарма бошлиғи ўринбосари.

Аввалроқ Шавкат Мирзиёев Ангор туманидаги ғалла ва ғўза майдонида бўлгани хабар қилинган эди.