Коронавирусга қарши эмланишдан олдин ёки кейин аллергияга қарши дориларни қабул қилиш иммунитетга салбий таъсир кўрсатиши хабар қилинди. Бу ҳақда Роспотребнадзор маълумотига таяниб, «РИА Новости» хабар берди.

Келтирилишича, бундай турдаги препаратлар вакцинага бўлган реакцияни, жумладан, иситма ва вакцина юборилган тана қисмидаги оғриқни камайтирмайди.

«Бундай дориларни қабул қилиш шарт эмас, чунки улар фақат зарар келтиради. Яқинда ўтказилган тадқиқот натижаларига кўра антигистаминлар (аллергияга қарши препаратлар)  қабул қилиш эмлашдан кейин иммунитетга салбий таъсир кўрсатади», — дейилган хабарда.

Таъкидланишича, агар бемор доимий равишда шифокор буюрган аллергияга қарши воситаларни қабул қилса, эмлаш сабабли қабулни тўхтатмаслиги керак.

Аввалроқ ЖССТ коронавирусга қарши эмланмаганларни огоҳлантирганди. Шунингдек, ЖССТ коронавирусга қарши навбатдаги вакцинани фавқулодда қўллашни тасдиқлаган.