Буюк Британия қироличаси Елизавета II тахтдан воз кечишининг иккита сабабини айтиб ўтди. Бу ҳақда «Daily Star» хабар берди.

Биограф Мэтью Деннисоннинг айтишича, қиролича ўзининг амакиваччаси Маргарет Роудс билан қироллик ваколатларидан воз кечиш эҳтимолини муҳокама қилган. Унга кўра, Елизавета II қариндошига ёзган мактубида тахтни фақат инсульт ёки Альцгеймер (мия фаолиятининг бузилиши, нейродегенератив хасталик) касаллигига чалинганида тарк этиши мумкин.

Деннисон, шунингдек, қиролича ўз ваколатларини умр бўйи бажариши, бошқа мутахассислар бу фикрга қўшилиши ва қиролича ҳеч қачон тахтдан воз кечмаслигини таъкидлаган.

«Сизни ишонтириб айтаманки, Елизавета II тахтдан воз кечмайди. Қироличанинг соғлиғи жуда яхши эканига оид барча маълумотлар мавжуд ва агар у насиб қилса, узоқ вақт бизнинг қироличамиз бўлиб қолади», — деган қироллик тарихчиси Хьюго Викерс.

Маълумот ўрнида, Елизавета II 1952 йил 6 февралда йигирма беш ёшида тахтга ўтирган. Ҳозирда у Британия ва дунё тарихидаги энг узоқ ҳукмронлик қилган ва энг кекса давлат бошлиғи ҳисобланади.

Аввалроқ Британия қироличаси Елизавета II’нинг сирли мулки ҳақида маълумот берилганди. Шунингдек, унинг турмуш ўртоғи вафот этгани маълум қилинган.