Бухоро вилояти Ғиждувон туманида бинодан фойдаланиш учун рухсатнома олиб беришини айтиб, пора олган кадастр ходими қўлга олинди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, Бухоро вилояти ҳуқуқни муҳофаза қилувчи идоралар ходимлари томонидан тезкор тадбир ўтказилган. Унда Давлат солиқ қўмитаси ҳузуридаги давлат кадастрлар палатаси Ғиждувон туман филиали ходими фуқарога вилоят қурилиш назорати инспекциясида ишловчи танишлари орқали туманнинг Ю.Ҳамадоний кўчасида жойлашган бинодан фойдаланишга рухсатнома олиб бериш эвазига 3 000 000 сўм олгани аниқланган.

Таъкидланишича, 27 ёшли Э.С. «Жасмина шифо мед» тиббиёт клиникаси биносида таниши орқали кимёвий ишлов берилган пулларни олаётган вақтида ашёвий далиллар билан қўлга олинган.

Мазкур ҳолат юзасидан Э.С.га нисбатан Жиноят кодексининг 168-моддаси (Фирибгарлик) 1-қисми ва 211-моддаси (Пора бериш) 1-қисми билан жиноят иши қўзғатилиб, дастлабки тергов ҳаракатлари олиб борилмоқда.

Аввалроқ Жиззахда фуқарони ер ажратиш тўғрисидаги рўйхатга ноқонуний киритиб қўйган собиқ кадастр ходими ушлангани маълум қилинган. Шунингдек, Сирдарёда 1200 долларга ер ажратиб бермоқчи бўлган қурилиш бўлими бошлиғи ушлангани хабар қилинган.