Россия президенти Владимир Путин ҳамда AҚШ президенти Жо Байденнинг 16 июн куни Женевада учрашгани ҳақида хабар берилганди. Икки давлат раҳбари ўртасидаги саммит якунлангач, Путин журналистлар билан учрашди. Бу ҳақда «РИА Новости» хабар берди.

Маълум қилинишича, жараён давомида журналистлардан бири 9 ёшли қизининг номидан Россия президентига мурожаат қилган.

«Жаноб президент, бу ерга келишимдан олдин 9 ёшли қизим мендан ‘Нима учун Россия ҳамда AҚШ раҳбарларининг учрашиши шунчалик муҳим?’ дея сўради. Болаларга ушбу ҳолатни қандай тушунтирган бўлардингиз?» — дея савол берган журналист давлат раҳбарига.

Путин, ўз навбатида, AҚШ раҳбари Жо Байден билан учрашув нима учун кераклиги ҳамда муҳимлигига аниқлик киритган.

«Жавоб жуда оддий. Уларга қараб, шундай дейиш керак: ‘Бу дунё жуда гўзал. Икки қудратли мамлакат раҳбарлари эса дунёни сайёрамизнинг барча аҳолиси учун хавфсиз, ишончли ҳамда фаровон уйга айлантириш учун учрашмоқда. Жараёнда улар чекланиши керак бўлган даҳшатли қуроллар билан боғлиқ масалаларни муҳокама қилади ва улардан фойдаланмасликнинг умумий қоидаларини ишлаб чиқади.

Улар атроф-муҳитни муҳофаза қилиш, дарёлар ва денгизларни тоза сақлаш, сув тошқини, қурғоқчилик бўлмаслиги, сайёранинг барча аҳолиси учун қаерда бўлишидан қатъи назар, озиқ-овқат етишиши ҳақида гаплашади. Улар бирорта касал бўлмаслиги учун соғлиқни сақлаш билан боғлиқ муаммолар ҳақида суҳбатлашади», — дея таъкидлаган Путин.

Аввалроқ Путин АҚШни долларни сиёсий мақсадларда ишлатишда айблагани хабар берилган. Шунингдек, Россияда янги ҳарбий қуроллар ишлаб чиқарилишини маълум қилганди.