Россиянинг Сеченов университети, радиология бўйича Миллий тиббиёт маркази ва Нормал физиология илмий-тадқиқот институти тадқиқотчилари коронавирус болаларда кўричакка олиб келиши муминлигини айтди. Бу ҳақда «Известия» хабар берди.

Маълум бўлишича, олимлар яқинда кўричаги олиб ташланган икки ёшдан 18 ёшгача бўлган болаларда текширув ўтказиб, уларни икки гуруҳга бўлган. Биринчи гуруҳга коронавирус учун ижобий ПЗР тести, иккинчисига салбий натижа кўрсатган болалар киритилган. Барча намуналарни ўрганишда ўткир йирингли кўричак белгилари аниқланган.

Биринчи гуруҳдан олинган маълумотларга кўра, кўричак тананинг умумий яллиғланишга қарши ҳолати туфайли бошланган. Шу тариқа олимлар коронавирусдан сўнг иммунитет тизими бир мунча вақт давомида ҳаддан ташқари фаол бўлиб, бу кўричакнинг яллиғланиш хавфини ошириши мумкин деган хулосага келган.

Аввалроқ ЖССТ коронавирус пандемиясининг болалар учун жиддий хавфини маълум қилган. Шунингдек, олималар коронавируснинг яна бир хавфли оқибатини аниқлаганди.