Нукусдаги кўчаларнинг бирини сув босди
Нукус шаҳрининг Беруний кўчасини ариқда сувнинг меъёрдан ортиқ оқиши сабаб сув босди. Бу ҳақда Қорақалпоғистон ФВБ «Bugun.uz»га маълумот берди.
Маълум бўлишича, Нукус шаҳри Беруний кўчаси «Тоза ҳудуд» ДУКнинг ёнидаги ичимлик сув тармоғида носозлик юзага келгани бўйича Нукус шаҳар сув таъминоти филиалига хабар келиб тушган. Филиал ходимлари чақирув бўйича манзилга етиб бориб, текшириш ишларини олиб борган.
Таъкидланишича, ўрганишлар натижасида сув қувурдан сизиб чиқмаётгани ҳамда бунга далаларни суғориш учун фойдаланиладиган ариқнинг тўлиб-тошиб кетиши сабаб бўлгани аниқланган.
Аввалроқ Самарқандда ёғингарчилик оқибатида кўчаларни сув босгани хабар қилинган. Шунингдек, Нукусда қувур ёрилиб, сув ташқарига оқаётгани акс этган видеога муносабат билдирилган.
