Тошкент шаҳри Юнусобод туманида дўкон очишга рухсатнома олиб бериш учун 2000 доллар олган эркак қўлга олинди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум бўлишича, Бош прокуратура ҳузуридаги департамент ҳамда Давлат хавфсизлик хизматининг Юнусобод тумани бўлимлари томонидан тезкор тадбир ўтказилган. Унда Д.К. исмли фуқаро тадбиркор А.га танишлари орқали туманда жойлашган дала дўконидан фойдаланиш учун ижара шартномасини расмийлаштириб беришини айтгани аниқланган. Таъкидланишича, Д.К. бунинг учун 2000 долларга келишиб, шундан 1000 долларни олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (Фирибгарлик) ва 211-моддаси (Пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Андижонда давлат ҳисобидаги ерни ажратиб беришини айтиб, пул олганлар ушлангани маълум қилинган. Шунингдек, Тошкентда 27 сотих ер олиб беришини айтиб, пул ишламоқчи бўлган шахс ушлангани хабар қилинган.