Россия презинденти Владимир Путин Навальний билан боғлиқ саволга жавоб берди. Бу ҳақда «Известия» хабар берди.

Маълум қилинишича, Женевада 16 июнь куни бўлиб ўтган саммитдан сўнг Россия президенти конференция доирасида журналистлар билан ушрашган ва Россия мухолифат етакчиси ҳақидаги саволга жавоб берган.

Унинг сўзларига кўра, россиялик блогер Aлексей Навальний қонунни бузаётганини билган ва буни атайин қилган.

«Биринчидан, бу одам Россияда амалдаги қонунни бузаётганини билган. У икки марта шартли қамоқ жазосига ҳукм қилинган шахс сифатида рўйхатдан ўтиши керак бўлган. Aммо онгли равишда қонуннинг ушбу талабига эътибор бермасдан, чет элга даволаниш учун кетган. Қонун талабларини эътиборсиз қолдиргани учун ҳам қидирувга берилган», — дейди президент.

Давлат раҳбарининг қайд этишича, Навальний шуни билган ҳолда ортда қайтган ва ўзи ҳибсга олинишини хоҳлаган. «У ўйлаган ишини қилди. Шунинг учун бу ерда ойдинлаштириш керак бўлган ҳеч нарса қолмади», — дея сўзига якун ясаган Путин.

Аввалроқ Путин Байденнинг уни «қотил» деб атаган гапига жавоб қайтарган. Шунингдек, дунё тартибига нисбатан бўлаётган энг катта таҳдидлар ҳақида айтганди.