Эрон ташқи ишлар вазири Саид Хатибзода G7 ва НАТО давлатлари Теҳронга «ақл ўргатиш» ҳуқуқига эга эмаслигини айтди. Бу ҳақда «ТАСС» хабар берди.

Келтирилишича, уч кунлик G7 саммити натижаларидан сўнг баёнот эъон килиниб, унда иттифоқ мамлакатлари ядровий келишувни янгилаш тарафдор бўлган, аммо Эронни ракета дастурини ишлаб чиқишдан воз кечишга чақирган. Шунингдек, ҳужжатда G7 давлатлари Теҳронни «нодавлат қуролли гуруҳларни» қўллаб-қувватлаётгани учун қоралаган.

Таъкидланишича, 14 июндаги НАТО баёнотида ҳарбий блокнинг мақсадларидан бири Эроннинг ядро қуроли яратилишининг олдини олиш экани айтилган. Бундан ташқари, Шимолий Атлантика альянси Теҳронни ракета дастурини ишлаб чиқишни тўхтатишга ундаган.

«Минтақадаги НАТО ва ‘Кучли еттилик’ давлатлари ҳаракатларининг ҳалокатли оқибатларини ҳисобга олган ҳолда улар минтақавий тинчлик ва барқарорликнинг қалъаси бўлган Эронга ‘ақл ўргатишга’ ҳақли эмас. Шунингдек, НАТО ва G7 давлатлари бошқаларга нима қилиш кераклигини ўргатишдан тўхтаб, ўзлари халқаро ҳуқуққа риоя қилишни бошлаши керак», — деган Эрон ташқи ишлар вазири.

Аввалроқ Исроил ташқи разведка хизмати собиқ директори Эронга қарши яширин операциялар ҳақида гапирганди. Шунингдек, Россия Эронга юқори аниқликдаги сунъий йўлдош сотиши маълум қилинган.