«Ал-Қоида» собиқ етакчиси Усама бин Лодиннинг жияни Россия–АҚШ саммитида норозилик билдирди
«Ал-Қоида» террорчилик ташкилоти собиқ раҳбари Усама бин Лодиннинг жияни Нур бин Лодин Женевада 16 июнь куни бўлиб ўтган Россия–АҚШ саммитида норозилик билдирди. Бу ҳақда «Recount»га таяниб, «Daily Mail» хабар берди.
Маълум қилинишича, Нур бин Лодин саммит куни қўлда «Трамп ғолиб» деб ёзилган плакат билан қайиқда пайдо бўлган ва шу билан Россия-Америка саммитига қарши эканини кўрсатган.
Унинг фикрига кўра, 2020 йилда бўлиб ўтган АҚШдаги президентлик сайловларида Жо Байден эмас, Дональд Трамп ғалаба қозонган.
Маълумотларга кўра, Нур бин Лодин қайиқда ушбу плакат билан пайдо бўлганидан сўнг зудлик билан ҳуқуқ-тартибот идоралари ходимлари воқеа жойига етиб борган ва уни тартибни бузгани учун ҳибсга олиниши мумкинлиги ҳақида огоҳлантирган.
Аввалроқ Россия ва АҚШ президентлари учрашгани маълум қилинган. Шунингдек, Путин AҚШ раҳбари Жо Байден билан учрашув нима учун кераклиги ҳамда муҳимлигига аниқлик киритган.
