AҚШнинг собиқ президенти Дональд Трамп 16 июнь куни Женевада бўлиб ўтган Aмерика рабари Жо Байден ва Россия президенти Владимир Путин саммитига баҳо берди. Бу ҳақда «Fox News» хабар берди.

Трампнинг маълум қилишича, Женевада бўлиб ўтган саммитда Москва ғолиблик позициясида қолган, AҚШ эса ҳеч нарсага эришмаган.

«Биз ҳеч нарса олмадик, саҳнани Россияга бердик, ҳеч нарсага эга бўлмадик. Менимча, бу Россия учун яхши кун бўлди», — деган AҚШнинг собиқ президенти.

Шунингдек, Трамп Байден Россиянинг «Шимолий оқим-2» газ қувури қуриш лойиҳасини амалга оширишга тўсқинлик қилмаганидан афсусда эканини айтган. Бундан ташқари, у Россия билан ҳамкорлик AҚШ учун манфаатли бўлиши мумкинлигини инобатга олиб, Байденнинг ўрнида бўлганида унга қарши санкцияларни бекор қилишини айтган.

«Уларга иқтисодиёт, бизга эса уларда бор нарса керак. Улар минерал-хомашё жиҳатидан жуда қимматли ерларга эга», — дея Трамп ўз позициясини тушунтирган.

Aмериканинг собиқ раҳбари «Путин билан яхши муносабатда бўлгани»га, аммо ҳеч ким унингдек «Россия билан қаттиқроқ бўлмагани»га ишонч билдирган. 

Аввалроқ Трамп Байденга Путин билан бўладиган учрашувда ухлаб қолмасликни тавсия қилганди. Шунингдек, Трамп Байденнинг сиёсатини кескин танқид қилганди.