Қирғизистон бош вазири Улуғбек Марипов ўз лавозимини исталган вақтда тарк этишга тайёрлигини айтди. Бу ҳақда «24.kg» хабар берди. 

Маълум қилинишича, бош вазир ушбу баёнотни парламентнинг аграр сиёсат ва ҳудудларни ривожлантириш қўмитаси йиғилишида мамлакатда кузатилаётган сув етишмовчилиги ҳамда нархлар ўсаётгани борасида ҳукуматни танқид қилган депутатларнинг сўзларига жавобан берган. 

«Сиз суғориш сувининг танқислиги ва озиқ-овқат маҳсулотлари нархининг доимий кўтарилишида бизни айбдор деяпсиз. Агар шундай бўлса, ҳозироқ истеъфога чиқишга тайёрман», — дея таъкидлаган ҳукумат раҳбари.

Унинг сўзларига кўра, парламент аъзолари ва аҳолининг норозилиги, ҳақиқатан, асосларга эга, аммо ҳозирги пайтда айбнинг катта қисми шошилинч муаммоларни ҳал қилмаган олдинги ҳукуматлар зиммасидадир.

«Биз туну кун мижжа қоқмасдан ишлаяпмиз. Агар ҳар олти ойда бир марта бош вазир ва ҳукуматни алмаштирадиган бўлсак, вазият ижобий томонга ўзгармайди, муаммолар эса ҳал бўлмайди», — деб хулоса қилган Марипов.

Аввалроқ Қирғизистон парламенти депутати сохта дипломга эгалиги аниқлангани хабар берилган. Шунингдек, мамлакатда энергетика тизими ўта оғир вазиятда экани айтилганди.