Тошкент шаҳри Сайилгоҳ кўчаси манзилида жойлашган собиқ «Марказий бино» 210 миллиард сўмга «Metropol Group» МЧЖ томонидан сотиб олинди. Бу ҳақда Давлат активларини бошқариш агентлиги ахборот хизмати хабар берди.

Маълум қилинишича, Тошкент шаҳри Миробод тумани Бухоро ва Нуронийлар кўчалари кесишуви манзилида жойлашган «Газеталар ишлаб чиқариш мажмуаси» биноси бўйича 78,0 миллиард сўм сотиб олиш нархи билан — «Metro Plaza» МЧЖ ҳамда Тошкент шаҳри Яккасарой тумани Юсуф Хос Ҳожиб кўчаси манзилида жойлашган «Ичан қалъа» меҳмонхона мажмуаси бўйича 74,2 миллиард сўм сотиб олиш нархи билан — «Quardo IH DMCC» компанияси ғолиб деб топилган. 

Шунингдек, Давлат активларини бошқариш агентлиги савдо ғолиблари билан давлат активининг сотилиши юзасидан олди-сотди шартномасини расмийлаштириш ишларини бошлайди.

Аввалроқ Тошкентдаги «Сойлиқ» оромгоҳи аукционда сотилгани хабар қилинганди. Шунингдек, Ўзбекистонда ноқишлоқ ерларни хусусий секторга фақат аукцион орқали сотиш тартиби киритилиши маълум қилинган.