Фарғона туманида 17 июнь куни қудуқни тозалашга тушган фуқаро ҳалок бўлди. Бу ҳақда Фавқулодда вазиятлар вазирлиги ахборот хизмати хабар берди.

Маълум қилинишича, Дўстлик маҳалласи Нилуфар кўчасидаги уйларнинг бирида 50 метр чуқурликдаги қудуқни тозалаш мақсадида тушган фуқаро С.С.нинг бошига ичида турпоқ тўла темир челак тушиб, воқеа жойида ҳалок бўлган.

Ушбу ҳолатга аниқлик киритилганда, уй эгаси С.С. томонидан қудуқни тозалаш ишлари олиб бораётган вақтда темир челак арқони узилиб кетгани маълум бўлган. Бошидаги ҳимоя каскаси борлигига қарамасдан фуқаро оғир тан жароҳати билан ҳалок бўлган.

Шунингдек, ҳодисани кузатиб турган фуқаро Р.Т. ёрдам бериш мақсадида чуқурликка тушган ва қайтиб чиқолмаган.

Мазкур вазият юзасидан вилоят ФВБ ходимлари зудлик билан белгиланган манзилга етиб борган. Қутқарувчиларнинг тезкор ҳаракатлари натижасида қутқарув асбоб-анжомлари ёрдамида 50 метрлик қудуқдан 2 нафар фуқаро олиб чиқилган. Ҳолат юзасидан дастлабки терговолди суриштирув ишлари олиб борилмоқда.

Аввалроқ Бухорода 9-синф ўқувчиси сув оқизиб кетиши оқибатида чўкиб, ҳалок бўлгани ҳақида хабар берилганди. Шунингдек, Қорақалпоғистонда 3 киши тупроқ босиб қолиши оқибатида ҳалок бўлгани хабар қилинган.