Ҳиндистонда шифокорлар илгари аниқланган қўзиқорин касалликлари, жумладан «қора», «оқ» ва «сариқ моғор» фонида коронавирусга чалинган беморда «яшил моғор» касаллигини қайд этди. Бу ҳақда «Hindustan Times» хабар берди.

Нашрнинг таъкидлашича, ушбу касаллик аниқланган 34 ёшли эркак ўпкасининг 90 фоиз яллиғланиши билан коронавирусга қарши даволанган. Aммо кўп ўтмай бемор бурнидан қон кета бошлаган ва иситмаси кўтарилган. Шифокорлар уни мукормикоз ёки «қора моғор» билан касалланган деб тахмин қилган. Бироқ текширув натижасида эркакда «яшил моғор» борлиги аниқланиб, даволаниш учун Мумбайдаги касалхонага ётқизилган.

«Ташхис қўйиш давомида унинг ўпкасида мукормикоз ёки қора қўзиқориндан фарқ қиладиган яшил қўзиқорин инфекцияси аниқланди. Бу мамлакатда қайд этилган биринчи ҳолат бўлиши мумкин», — деган давлат Соғлиқни сақлаш бошқармаси вакили Aпурва Тивари.

Мутахассисларнинг фикрига кўра, мукормикоз реанимация бўлимида бўлган ва узоқ вақт стероидлар ёки кислород билан таъминланган коронавирус инфекциясига чалинган беморларда аниқланади. Касаллик узоқ вақт давомида катта миқдордаги стероидларни қабул қиладиган диабет касалларида ҳам учрайди, шу туфайли уларнинг иммунитети пасаяди.

Аввалроқ Ҳиндистонда болалар орасида хавфли яллиғланиш синдроми аниқланганди. Шунингдек, мамлакатда «қора моғор»га чалинганлар сони 150 фоизга ўсгани маълум бўлган.