Президент 17 июнь куни Андижон вилояти Избоскан туманидаги «And gold» тикув-трикотаж корхонасига ташриф буюрди. Бу ҳақда Президент матбуот хизмати хабар берди.

Маълум қилинишича, Избоскан туманининг Қўғай маҳалласида «Соҳиб омад баракаси» кластери томонидан «And gold» тикув-трикотаж корхонаси ишга туширилган. Бино 2 миллион 500 минг АҚШ доллари бўлган лойиҳа доирасида қурилган ва замонавий ускуналар келтириб ўрнатилган. Корхона йилига 3 миллион 500 минг дона тайёр трикотаж ишлаб чиқариш қувватига эга. Маҳсулотларни 100 фоиз экспортга йўналтириш режалаштирилган. Бу борадаги йиллик имконият 5 миллион доллардан зиёд. Калава ип етказиб бериш бўйича Хитой ва Россия билан шартнома тузилган.

Корхонада ҳозирча 830 нафар хотин-қиз ишли бўлган. Президент улар билан суҳбатлашган.

«Сизларга ўзимнинг ҳурматимни, муҳаббатимни билдираман. Ўзларингиз яшайдиган қишлоқда ишли бўлганларингиздан хурсандман. Қачон Избосканда мана шундай замонавий корхона бўлган? Бу ишларни яна давом эттирамиз. Хотин-қизларимиз учун ҳамма шароитларни яратамиз. Аёл ишли бўлиб, кайфияти яхши бўлса, оиласи ҳам бахтли бўлади», — деди Шавкат Мирзиёев.

Фабрика тўла қувватга чиққанда, чекка ҳудуддаги 1 минг 200 нафар киши доимий иш билан таъминланади.

Шунингдек, вилоятда саноат тармоқларини ривожлантириш чора-тадбирлари тақдимот қилинган.

Аввалроқ Шавкат Мирзиёев Aндижонга жўнаб кетгани хабар қилинганди. Шунингдек, Президент расмий ташриф билан Тожикистонга жўнаб кетгани маълум қилинган.