Самарқанд туманида ўзини ҳокимият ходими деб таништириб, ер олиб бериш учун 6700 доллар олган фуқаро қўлга олинди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум бўлишича, Бош прокуратура ҳузуридаги департаментнинг Самарқанд тумани бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Унда фуқаро Ш.С. «Х.» МЧЖ раҳбарига ўзини туман ҳокимлиги ходими сифатида таништириб, унга тиббиёт бирлашмаси ёнидан савдо дўкони қуриш учун 50 квадрат метр ер майдони олиб беришни ваъда қилиб, эвазига 6700 доллар олгани аниқланган. Шу билан бирга, у келишилган пулдан 3000 долларни ўз ихтиёри билан қайтаргани процессуал тартибда расмийлаштирилган.

Мазкур ҳолат юзасидан Жиноят кодексининг 168- (Фирибгарлик) ва 211-моддалари (Пора бериш) билан жиноят иши қўзғатилиб, тергов ҳаракатлари ўтказилмоқда. 

Аввалроқ Сурхондарёда ҳокимиятда ишлашини айтиб, ер олиб беришни ваъда қилган эркак ушлангани маълум қилинган. Шунингдек, Андижоннинг айрим туманларида ер олиб беришни ваъда қилиб, пул сўраган шахслар ушлангани хабар қилинганди.