Жаҳон банки Ўзбекистонга солиқ тизимини ривожлантириш учун 60 млн доллар кредит ажратади. Бу ҳақда «Spot» хабар берди.

Маълум бўлишича, Жаҳон банки Ижрочи директорлар кенгаши томонидан Ўзбекистон Давлат солиқ қўмитасининг операцион самарадорлигини оширишга қаратилган «Солиқ маъмуриятчилигини ислоҳ қилиш» лойиҳаси маъқулланган.

Таъкидланишича, лойиҳа 60 миллион доллар миқдоридаги имтиёзли кредит ҳисобига амалга оширилади. Жаҳон банки гуруҳининг таркибига кирувчи Халқаро тараққиёт ассоциацияси ушбу маблағни Ўзбекистон ҳукуматига паст фоизда 30 йилгача бўлган муддатга имтиёзли кредит шаклида тақдим этади.

«Ҳукумат мамлакатдаги бизнес ва инвестиция муҳитини яхшилаш мақсадида солиқ маъмуриятчилиги тизимидаги ислоҳотларга устувор аҳамият бермоқда. Янги лойиҳа Давлат солиқ қўмитасининг фаолиятини солиқ тўловчилар манфаатлари нуқтаи назаридан такомиллаштиришга ёрдам беради», — деди Жаҳон банкининг Ўзбекистондаги ваколатхонаси раҳбари Марко Мантованелли.

Шунингдек, мазкур дастур учта асосий компонентни ўз ичига олиши айтилган. Улар Давлат солиқ қўмитасининг операцион, институционал, технологик ва инсон салоҳиятини ривожлантиришга ёрдам беради. Шу билан бирга, Ўзбекистонда солиқ қонунчилиги талабларига ихтиёрий риоя қилишни рағбатлантиради.

Аввалроқ Ўзбекистон халқаро молия институтларидан 200 миллион доллар қарз олиши хабар қилинган. Шунингдек, Ўзбекистоннинг 2020 йилдаги ташқи қарзи 5,4 миллиард долларга ошгани эълон қилинган.