Ўзбекистонда «Жисмоний тайёргарлик даражаси» кўкрак нишони таъсис этилади. Бу ҳақда ЎзA хабар берди.

Маълум қилинишича, Президент Туризм ва спорт вазирлигининг спорт синовларини муваффақиятли топширган шахслар учун «Жисмоний тайёргарлик даражаси» кўкрак нишонини таъсис этиш тўғрисидаги таклифини маъқуллаган.

Бунда спорт синовларининг махсус талабларини бажарган ғолиблар I, II, ва III даражали кўкрак нишонлари билан тақдирланади.

Туризм ва спорт вазирлиги:

• бир ой муддатда Aҳолининг жисмоний тайёргарлик даражасини баҳолаш тизими бўйича спорт синовларини ташкил этиш ва ўтказиш тўғрисидаги низомни, «Жисмоний тайёргарлик даражаси» кўкрак нишони ва гувоҳномасининг тавсифларини тасдиқлаш ҳақидаги ҳукумат қарори лойиҳасини Вазирлар Маҳкамасига киритади;
• икки ой муддатда Давлат статистика қўмитаси билан биргаликда аҳолининг спорт синовлари билан қамраб олинишини баҳолаш мезонларини ишлаб чиқиб, барча давлат органлари ва ташкилотлари ходимлари кесимида рейтинг асосида таҳлил қилиш тизимини жорий этади.

Шунингдек, Туризм ва спорт вазирлиги, Aхборот технологиялари ва коммуникацияларини ривожлантириш вазирлиги ҳамда манфаатдор спорт федерацияларининг спорт синовларини баҳолаш тизими меъёрлари, спорт разрядлари ва унвонлари, ўтказиш графиклари ва иштирокчилар учун тавсиялар платформасини (www.jtdss.uz) ҳамда спорт синовлари иштирокчилари ҳақидаги ягона электрон базани яратиш тўғрисидаги таклифи маъқулланган.

Платформа ва ягона электрон базани ишлаб чиқиш, уларга хизмат кўрсатиш ва кейинчалик модернизациялаш бўйича буюртмачининг функциялари Туризм ва спорт вазирлигига юклатилади.

Aввалроқ Шавкат Мирзиёев «Аҳолининг жисмоний тайёргарлик даражасини баҳолаш тизимини жорий этишнинг ташкилий чора-тадбирлари тўғрисида»ги қарорни имзолагани ҳақида хабар берилганди. Унга кўра, 2021 йил 1 августдан бошлаб аҳолининг жисмоний тайёргарлик даражасини баҳолаш тизими жорий этилади.