Афғонистонда АҚШ ҳарбийлари чиқиб кетганидан сўнг террорчилик ҳаракатларининг кучайиш эҳтимоли баҳоланди. Бу ҳақда АҚШ Мудофаа вазирлигининг штаб-квартираси бўлмиш Пентагонга асосланиб, «РИА Новости» хабар берди.

Пентагон раҳбари Ллойд Остиннинг маълумотларига кўра, Афғонистондаги «Ал-Қоида» сингари халқаро террористик гуруҳларининг Америка қўшинлари мамлакатдан чиқиб кетганидан кейин қайта тикланиб, яна ҳужумлар қилиши учун тахминан икки йил керак бўлади.

«Мен террорристик ҳаракатларнинг кучайиш эҳтимолини ўртача деб баҳолаган бўлар эдим. Шуни ҳам таъкидлашни истардимки, бундай имкониятларни ривожлантириш учун уларга икки йил вақт керак бўлади», — дея таъкидлаган Остин.

Маълумот ўрнида, АҚШ президенти Жо Байден 2021 йил 14 апрель куни Америка тарихидаги энг узоқ хорижий ҳарбий кампанияга айланган Афғонистондаги операцияни тугатишга қарор қилганди. Ҳарбийларни олиб чиқиб кетиш жараёни 11 сентябрга қадар тугатилиши режалаштирилган.

Маълум қилинишича, АҚШ операцияси энг юқори чўққига чиққан 2010–2013 йилларда Афғонистондаги Ғарб кучлари сони 150 минг кишидан ошган. АҚШ ва НАТОнинг асосий жанговар бўлинмалари 2014 йилда Афғонистондан чиқарилган.

Аввалроқ АҚШ Афғонистондаги ҳарбий техникани йўқ қилишни бошлагани маълум қилинган. Шунингдек, Байден Американинг давомли урушини тўхтатишга қарор қилгани ҳақида хабар берилганди.