Шимолий Корея етакчиси Ким Чен Ин мамлакат АҚШнинг янги маъмурияти билан ҳам мулоқотга, ҳам қарама-қаршиликка тайёрланиши кераклигини маълум қилди. Бу ҳақда Шимолий Корея марказий телеграф агентлигига таяниб, «РИА Новости» хабар берди.

Маълум қилинишича, Ким Чен Ин мамлакатнинг Меҳнат партияси Марказий қўмитасининг пленумида нутқ сўзлаган ва у ерда янги Америка маъмуриятининг Пхеньянга нисбатан сиёсатини таҳлил қилган.

«Ким Чен Ин давлатнинг қадр-қимматини ҳимоя қилиш учун АҚШ билан муносабатларда ҳам мулоқотга, ҳам қарама-қаршиликка ҳар томонлама тайёргарлик кўриш зарурлигини таъкидлади», дейилади хабарда.

Маълумот ўрнида, АҚШ президенти Жо Байден 2021 йилнинг май ойида Шимолий Корея раҳбари Ким Чен Инни мамлакатини ядросизлантиришга рози бўлса, у билан учрашишга тайёрлигини эълон қилганди. Оқ уй вакили Жен Псакининг айтишича, АҚШ КХДРга нисбатан сиёсатини қайта кўриб чиқишни якунлаган бўлиб, янги сиёсат аввалги икки президентнинг йўналишидан фарқ қилади. Таъкидлашича, бу амалий ривожлантиришга йўналтирилган бўлади, шунингдек, АҚШ бу борада Жанубий Корея, Япония ҳамда минтақадаги бошқа иттифоқчилар билан маслаҳатлашишни давом эттиради.

Аввалроқ Шимолий Кореяни моторсиз темир йўл вагонида тарк этган россиялик дипломатлар Москвага етиб келгани маълум қилинган. Шунингдек, Шимолий Корея ҳукумати мушук ва каптарларни ўлдиришни буюргани ҳақида хабар берилганди.