Жиззах вилояти Зомин туманидаги Чорводор ҚФЙга қарашли узоқ йиллардан буён сув танқислиги муаммоси билан яшаётган Ўртақишлоқ аҳолиси учун 17 июнь, пайшанба куни қазиб берилган қудуқнинг очилиш маросими ўтказилди. Бу ҳақда «Bugun.uz» мухбири хабар қилди.

Маълум бўлишича, 2021 йил 31 май куни Жиззах вилояти Зомин туманидаги Чорводор ҚФЙга қарашли Ўртақишлоқ аҳолиси «Artel» компанияси раҳбариятига мурожаат қилган. Мурожаатда айтилишича, узоқ йиллардан буён Ўртақишлоқ аҳолиси ичимлик сувини олис масофадан ташиб ичади. Шунингдек, электр қувватининг пасайиши, ундаги узилишлар сабаб сувга узоқ навбат ҳосил бўлади.

Бунинг оқибатида маълум соатдагина ишлайдиган артизан қудуғи сувидан кўпчиллик бенасиб қолади. Шундай вақтларда 70 хўжаликдан иборат қишлоқ аҳли бир ярим ойда бир марта келадиган ариқ сувидан ичишга мажбур. Бу сув аҳоли хонадонларидаги ҳовузда сақланади. 

Таъкидланишича, ичимлик суви сифатининг пастлиги ҳамда сув таъминотида санитар — гигиеник қоидаларнинг бузилишлари оқибатида кейинги йилларда 1500 дан зиёд фуқаро яшайдиган Ўртақишлоқ аҳолиси, айниқса, болалар ўртасида юқумли касалликлар, хусусан, гепатит А — сариқ касаллиги кўпайган. Аҳолининг асосий даромади чорва моллари ҳисобланади. Сув танқислиги, унинг яроқсизлиги сабаб чорва молларида ҳам касалликлар кўпайгани аҳоли турмуш даражасига сезиларли зарар етказган.

Шу каби сабаблар туфайли ўртақишлоқликлар узоқ йиллар давомида турли идора ва ташкилотларга мазкур масалани ҳал этишни сўраб мурожаатлар қилган. Бундан ташқари, уларнинг чиқишлари ижтимоий тармоқларда муҳокамаларга ҳам сабаб бўлган.

«Artel» компанияси раҳбарияти мазкур ҳолатни ўрганиб Ўртақишлоқ аҳолиси учун артизан қудуғини қазиб берган. Яъни қисқа муддатда жами қиймати 300 миллион сўм маблағ эвазига 200 метр чуқурдан ичишга яроқли сув чиқариб берилган. Ушбу артизан қудуғи аҳолининг ичимлик сувига бўлган эҳтиёжини тўла қондириши қайд этилган. 

Эслатиб ўтамиз, аввалроқ Ўзбекистонда 2021 йилда ичимлик суви таъминоти учун қанча маблағ ажритилиши айтилганди. Шунингдек, Сенатда аҳолини ичимлик суви билан таъминлаш бўйича юборилган парламент сўрови кўриб чиқилгани ҳақида хабар берилганди.