Исроил Ғазо секторига яна ҳаво ҳужуми уюштирди
Исроил мудофаа кучлари Ғазо секторидаги ҲАМАС объектларига яна зарба берди. Бу ҳақда Исроил армияси баёнотига таяниб, «РИА Новости» хабар берди.
Маълум бўлишича, 17 июнь, пайшанба куни тунда Исроил ҳарбийлари анклавдаги бошқа нишонларга ҳам ҳаво ҳужуми уюштирган.
«Ғазодан Исроил томонга учирилган портловчи моддаларга жавобан биз Ғазодаги ҳарбий нишонларга ва ҲАМАСга тегишли ракета учириш майдончасига ҳужум қилдик», дейилган Исроил мудофаа кучларининг Twitter саҳифасида.
Шунингдек, мамлакат мудофаа кучлари турли сценарийларга тайёргарликни оширганини таъкидлаб, ҲАМАСнинг Ғазодаги объектларини нишонга олишни давом эттиришини қайд этган.
Маълумот ўрнида, Фаластин ва Исроил ўртасида ўт очишни тўхтатиш бўйича келишув 21 май куни соат 04:00 да (Тошкент вақти билан) кучга кирган эди.
Аввалроқ Исроилнинг Ғазога ҳужумлари оқибатида оилаларнинг йўқ қилиниши қасддан қилинган иш экани айтилганди. Шунингдек, Исроил қачон фаластинликлар билан бутунлай тинчлик ўрнатиши маълум қилган.
