Наманганда 13 нафар фуқарога қурилишда ишлаши учун ойига 500 доллар беришини айтиб, Қирғизистонга сотиб юборган эркак суд қилинди. Бу ҳақда «Bugun.uz»нинг Намангандаги мухбири хабар берди.

Маълум бўлишича, 2020 йил 4 сентябрь куни Р.Ж. Учқўрғон туманида яшовчи С.Э., А.П.га Қирғизистонда мактаб қурилишида ишлаши ҳамда уларга ойига 400–500 доллар беришини айтиб, Андижон вилояти Маданият МФЙдаги чегара пости орқали Қирғизистонга олиб ўтган. Ишлаш учун рухсатнома қилиб беришини айтиб, фуқаролик паспортларини олиб қўйган ва М. исмли танишига топширган. Шунингдек, Р.Ж. 2020 йил сентябрь ойидан октябрь ойига қадар Учўрғон туманида яшовчи бир неча фуқароларни ҳам худди шундай ваъдалар билан ўша танишига топшириб юборгани айтилган.

Таъкидланишича, Р.Ж. ва унинг шериги кетиб қолмаслиги учун ишчиларнинг паспортларини олиб қўйган. Ишчилар орасидан Х.А. Ўзбекистон чегарасига қочиб келиб, хизматчиларга ҳодисани маълум қилган. Шундан сўнг Р.Жга жиноят иши қўзғатилиб, тергов ва суриштирув ишлари олиб борилган.

Мазкур ҳолат юзасидан Жиноят ишари бўйича бўйича Учқўрғон туман суди Р.Ж.ни Жиноят кодексининг 135-моддаси (Одам савдоси) 2-қисми билан айбдор деб топиб, унга нисбатан 5 йил озодликдан маҳрум қилиш жазоси тайинлаган.

Аввалроқ Тошкентда қизларни Дубайга фоҳишалик қилиш учун сотиб юборган аёл суд қилингани хабар қилинган. Шунингдек, Хоразмда 22 ёшли қизни Уммонга фоҳишалик учун юбораётган шахслар қўлга олингани маълум қилинган.