Навоий вилояти Ғозғон шаҳрида 16 июнь куни отасининг дафн маросимидан қайтаётган О.З. ва унинг қариндошлари тошбўрон қилинди. Вилоят Ички ишлар бошқармаси ҳолат юзасидан маълумот берди.

Таъкидланишича, фуқаро О.З. (эркак) шу куни соат 08:00 да отасининг дафн маросимидан қайтаётганда аввалдан келишмовчилиги бўлган Р.О. (аёл) билан яна тортишган. Шундан сўнг Р.О. турмуш ўртоғи С.И.га воқеани айтиб берган. С.И. эса яна икки нафар таниши билан О.З.нинг олдига борган.

О.З. уйига кириб, қариндошларини айтиб чиққан. Шундан сўнг томонлар ўзаро жанжаллашиб, бир-бирига тош отган. Оқибатда О.З. ва М.Й тан жароҳати олиб, шифохонага ётқизилган. Ҳозирда фуқароларга нисбатан терговга қадар текширув ҳаракатлари олиб борилмоқда.

Аввалроқ Фарғонада танишларини тошбўрон қилган 2 йигит ушлангани ҳақида хабар берилганди. Шунингдек, Сурхондарёда савдогарлар уларни ҳақорат қилган паттачини тошбўрон қилгани хабар қилинган.