Польшанинг ҳукмрон «Қонун ва адолат» партияси раҳбари, бош вазир ўринбосари Ярослав Качиньский мамлакатга яқинда қилинган киберҳужум Россия ҳудудидан амалга оширилганини маълум қилди. Бу ҳақда «РИA Новости» хабар берди.

Унинг сўзларига кўра, Ички хавфсизлик агентлиги, Ҳарбий контрразведка хизмати томонидан тақдим этилган маълумотларда Польшанинг энг муҳим амалдорлари, вазирлари, турли сиёсий уюшмалари депутатлари киберҳужумнинг асосий нишони бўлгани қайд этилган.

«Ўз разведка хизматимиз ҳамда иттифоқдошларимизнинг разведка хизмати маълумотларини таҳлил қилиш киберҳужум Россия ҳудудидан амалга оширилгани тўғрисида аниқ хулоса қилишга имкон берди. Унинг кўлами ва қамров доираси кенг», — дейди Качиньский.

Маълум қилинишича, Польша ҳукумати 15 июнь куни мамлакат катта киберҳужумга учраганини эълон қилган. Бош вазир Матеуш Моравецкий ушбу ҳолат юзасидан ёпиқ мажлис ўтказган. Бир қатор оммавий ахборот воситалари берган маълумотларга кўра, хакерлик ҳужуми оқибатида тажовузкорлар махфий ҳужжатларга кириш ҳуқуқини қўлга киритган.

Аввалроқ АҚШ ҳукумати мамлакатга қилинган киберҳужум оқибатида фавқулодда ҳолат эълон қилган. Microsoft дастурий таъминотида кузатилаётган заифлик глобал киберхавфсизлик инқирозига айланиши мумкинлиги ҳақида хабар берилганди.