Шавкат Мирзиёевнинг янги қарори билан Маданий мерос агентлиги ташкил этилиши кутилмоқда. Бу ҳақда «Bugun.uz» манбаси хабар берди.

Хабарга кўра, бу «Туризм ва спорт вазирлиги ҳузуридаги Маданий мерос агентлиги фаолиятини ташкил этиш ҳамда соҳани инновацион ривожлантириш чора-тадбирлари тўғрисида» қарор лойиҳасида келтирилган. Қарор билан Туризм ва спорт вазирлиги ҳузурида Маданий мерос агентлиги ва унинг Қорақалпоғистон, вилоятлар ва Тошкент шаҳар маданий мерос бошқармалари ташкил этилади. Агентликка 6 та соҳа:

• моддий маданий мерос объектларини муҳофаза қилиш;
• музейлар;
• алоҳида муҳофаза қилинадиган тарихий-маданий ҳудудлар;
• археология;
• мамлакат ва хориждаги маданий бойликлар соҳаси бўйича асосий вазифалари белгиланади.

Агентлик моддий маданий мерос, музейлар, археология, маданий бойликларнинг олиб чиқилиши ва олиб кирилиши соҳасида махсус ваколатли давлат бошқарув органи ҳисобланади. Шунингдек, ўз ваколатлари доирасида қабул қилган қарорлари давлат ва хўжалик бошқаруви органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, фуқаролар томонидан бажарилиши мажбурий ҳисобланади.

Бундан ташқари, агентлик директори мақоми, меҳнатга ҳақ тўлаш, тиббий ва транспорт хизмати кўрсатиш шарт-шароитларига кўра туризм ва спорт вазирининг биринчи ўринбосарига тенглаштирилади. Агентлик директори ва унинг ўринбосарлари туризм ва спорт вазирининг тақдимномасига асосан Вазирлар Маҳкамаси томонидан лавозимга тайинланади ва лавозимидан озод этилади.

Эслатиб ўтамиз, аввалроқ Президент томонидан 6 апрель, сешанба куни «Туризм ва спорт вазирлиги фаолиятини ташкил этиш тўғрисида»ги қарор қабул қилинган эди. Унга мувофиқ 2 та ОТМда Маданий мерос объектларини асраш факультети очилиши белгиланган.