Россиянинг Челябинск шаҳридан 18 июнь куни 3 нафар фарзанди билан қийин аҳволда қолган ўзбекистонлик аёл ватанга қайтарилди. Бу ҳақда Ташқи меҳнат миграцияси агентлиги ахборот хизмати хабар берди.

Маълум бўлишича, самарқандлик З.Х. исмли аёл оиласидаги молиявий қийинчилик сабаб Россиянинг Челябинск шаҳрига ишлаш мақсадида кетган. Фуқаронинг ижтимоий тармоқлар орқали уйсиз ва пулсиз, вояга етмаган фарзандлари билан қийин аҳволда қолгани ҳамда ватанга қайтишга ёрдам сўрагани акс этган мурожаати тарқалган.

Таъкидланишича, Ташқи меҳнат миграцияси агентлиги томонидан аёл билан алоқа ўрнатилиб, вақтинча яшаш жойига жойлаштирилган. Фуқаронинг 2 нафар фарзандига Ўзбекистоннинг Екатеринбург шаҳридаги бош консулхонаси томонидан «Ватанга қайтиш гувоҳномаси» расмийлаштириб берилган.

Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан Екатеринбург–Самарқанд йўналишидаги авиарейс орқали Ўзбекистонга қайтарилган.

Аввалроқ Россияда 5 нафар фарзанди билан қийин аҳволда қолган ўзбекистонлик аёл ватанга қайтарилгани хабар қилинган. Шунингдек, Туркия ва Россияда қийин аҳволда қолган 6 нафар ўзбекистонлик ватанга қайтарилгани маълум қилинган.