АОКАда 18 июнь, жума куни Адлия вазири ўринбосари ҳамда Коррупцияга қарши курашиш агентлиги директори ўринбосари иштирокидаги матбуот анжуманида Тошкент шаҳар ҳокимлиги хорижий меҳмонлар зиёфатига сарфлаган салкам 30 миллион сўм давлат бюджетига қайтарилиш-қайтармаслиги бўйича изоҳ берилди. Бу ҳақда «Bugun.uz» мухбири хабар қилди.

Маълумотларга кўра, Тошкент шаҳар ҳокимлиги Россиядан келган делегациянинг биргина кечки овқати учун бюджетдан 27 миллион сўм харажат қилган. Россия мудофаа қўмитаси раиси Владимир Шаманов бошчилигидаги Россия қаҳрамонлари ассоциациясининг 28 кишидан иборат делегацияси 2021 йил 24 апрель куни пойтахт ҳокимлиги томонидан «Crystal garden» ресторанида меҳмон қилинган. 

Шунингдек, ресторандаги маҳсулотлар бозор нархидан анча қимматга тақдим этилган. Қайд этилишича, бу — Тошкентда бир марталик кечки овқат учун сарфланган бюджет маблағи. Коррупцияга қарши курашиш агентлиги директори ўринбосари Умида Тўхташева мазкур зиёафатга сарфланган маблағлар бўйича қуйидагича изоҳ берди:

«Келган меҳмонларни кутиб олиш бўйича давлат бюджетидан маблағ ажратилади. Бу маблағ мақсадли ва адекват бўлиши керак. Ҳозиргача бу масалалар тартибга солинмаган эди. Қандай буюртма берилса, шу асосда бюджетдан маблағ олиниши мумкин эди. Шу сабабли бу масала очиқлигича қолмоқда. Ушбу фармон (Президент 16 июнь куни «Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида»ги фармонни имзолаган) билан бу масала бўйича тартиб ишлаб чиқилмоқда. Маблағ қайтарилиш-қайтармаслик масаласи очиқлигича қолмоқда. Бу ерда бошқа жараён ҳам бўлиши мумкин. Қайсидир тартиб мободо бузилган бўлса, лекин тўғридан-тўғри айнан мана шунча маблағ ажратиш мумкин ёки ажратиш мумкин эмас деган масала йўқ. Бунга тегишли қоидалар энди ишлаб чиқилади», — деди Коррупцияга қарши курашиш агентлиги директори ўринбосари.

Аввалроқ ДХХ собиқ биноси ТИВ вазирининг ўғли томонидан сотиб олинганига муносабат билдирилгани ҳақида хабар берилганди.