Тошкент вилоятида сўмни қалбаки долларга айирбошлаган эркак ушланди
Тошкент вилояти Бўстонлиқ туманида 15 июнь куни фуқароларнинг сўм кўринишидаги пулларини қалбаки долларларга алмаштириб берган эркак ушланди. Бу ҳақда вилоят Ички ишлар бошқармаси ахборот хизмати хабар берди.
Маълум қилинишича, январь ойида фуқароларга қалбаки долларни ўтказган уч нафар эркакнинг икки нафари қўлга олинган ва учинчиси қидирувда бўлган. 2 нафар гумонланувчи вилоят Ички ишлар бошқармаси Хавфсиз туризмни таъминлаш бошқармаси ходимлари томонидан ушланган. Улардан 400 АҚШ доллари миқдоридаги қалбаки купюралар далилий ашё сифатида олинган. Шунингдек, Қўқон шаҳрида яшовчи 37 ёшли Ж.Ш. ҳодиса жойидан қочиб, тергов органларидан яширингани сабабли унга қидирув эълон қилинган.
Шундан сўнг 15 июнь куни ушбу қидирувдаги шахснинг яширинган манзили аниқланиб, қўлга олинган. Унга нисбатан қонуний чора кўриш учун вилоят ИИБга олиб келинган.
Аввалроқ Бухорода қалбаки 200 минг сўмни муомалага киритган 19 ёшли қиз ушлангани хабар қилинганди. Шунингдек, Тошкентда қалбаки 800 долларни муомалага киритганлар қўлга олинган.
