АОКАда 18 июнь, жума куни адлия вазири ўринбосари ва Коррупцияга қарши курашиш агентлиги директори ўринбосари иштирокидаги матбуот анжуманида 2021 йил 1 июлдан бошлаб давлат органлари ва ташкилотлари Очиқ маълумотлар порталига тегишли маълумотларни жойлаб бориши маълум қилинди. Бу ҳақда «Bugun.uz» мухбири хабар берди.

Қайд этилишича, давлат органлари ва ташкилотлари ҳар йили: 

• 1 мартга қадар ўз фаолиятига оид ҳисоботни расмий веб-сайтга жойлаштиради;
• 10 мартга қадар уни кенг жамоатчилик иштирокида муҳокама қилиш жойи ва вақти ҳақида хабар беради;
• 1 апрелга қадар ўз фаолиятига оид ҳисоботни кенг жамоатчилик иштирокида муҳокама қилиш учун матбуот анжуманларини ўтказади.

Шунингдек, веб-сайтда ва Очиқ маълумотлар порталида қуйидаги маълумотлар жойлаштирилади:

• амалга оширилган давлат харидлари, шу жумладан, тўғридан-тўғри шартномалар бўйича харид қилинадиган товарлар;
• мансабдор шахсларнинг хизмат сафарлари ва хориждан ташриф буюрган меҳмонларни кутиб олиш харажатлари;
• Ўзбекистон Президенти, Вазирлар Маҳкамаси ҳужжатлари билан солиқ ва божхона имтиёзлари ҳамда преференциялар, шу жумладан, индивидуал имтиёзлар берилган субъектларнинг бенефициарлари, улар томонидан тўланган солиқлар ва молиявий кўрсаткичлар;
• ўзларининг йиллик харажатлар сметаси ва унинг ижроси, шу жумладан, объектларни қуриш, реконструкция қилиш ва капитал таъмирлаш ишлари, автомототранспорт воситаларини сотиб олиш харажатлари.

Анжуманда, шулар билан бир қаторда, қуйидаги имтиҳонларни ўтказиш жараёни интернет тармоғида жонли эфирга узатилиши ҳам маълум қилинди:

• ОТМларнинг бакалавриат таълим йўналишларига кириш учун тест ва ижодий имтиҳонлар;
• магистратура босқичига қабул имтиҳонлари;
• республикадаги ёки хориждаги ОТМдан республикадаги давлат ОТМга ўқишни кўчириш истагини билдирган талабалардан олинадиган имтиҳонлар;
• хорижий таълим тўғрисидаги ҳужжатларни тан олишда талабгорлардан олинадиган тест синовлари.

Аввалроқ давлат органлари очиқлаши керак бўлган маълумотлар руйхати эълон қилинган.