Қрим ярим оролида содир бўлган кучли ёғингарчилик ҳудуднинг жануби ва шарқида тошқинларга олиб келди. Бу ҳақда «ТACC» хабар берди.

Маълум бўлишича, энг кўп зарар кўрган Керч шаҳри кўчаларида фақат қайиқларда ҳаракатланиш мумкин. Қрим ҳукумати масъулларининг сўзларига кўра, сўнгги бир йилда сув танқислиги бўлган ярим оролда атиги икки кун ичида сув омборларидаги захиралар сезиларли даражада тўлган. Шунингдек, кучли ёмғир оқибатида Ялтада ҳам транспорт ҳаракати тўхтатилган, сув, газ ва электр таъминоти етказиб беришда узилиш кузатилган.

«Aфсуски, ҳамма нарса бир вақтнинг ўзида содир бўлди: ёғингарчилик Керчда 85 миллиметр, Ялтада 133 миллиметрни ташкил қилди. Бу — 100 йил ичидаги энг юқори кўрсаткич. Aлбатта, ҳеч қачон бундай ҳажмдаги сув билан ҳеч ким курашмаган, бундай оқибатлар бартараф этилмаган», — деган Қрим раҳбари Сергей Aксенов.

У вазиятни «ҳалокатли» деб баҳолаган, аммо барча кучлар оқибатларни бартараф этиш учун сафарбар этилганини таъкидлаган. Тошқин бўлган ҳудудлардан 1387 киши эвакуация қилинган, уларнинг 238 нафари болалар ҳисобланади.

Керчда фавқулодда ҳолат бутун ярим оролда эълон қилинишидан олдин ҳам жорий қилинган. Шаҳар маъмурияти маълумотларига кўра, 300 га яқин бино ва унга қўшни ҳудудлар, шу жумладан, шаҳар касалхонаси сув остида қолмоқда, одамлар сузиш ва моторли қайиқлар ёрдамида ҳаракатланмоқда. Керчнинг марказий кўчалари ва чорраҳасида транспорт ҳаракати тўхтатилган. Шунингдек, кучли ёғингарчилик оқибатида Мелек-Чесме дарёси қирғоғидан тошиб кетган.

Аввалроқ Тожикистонда содир бўлган кучли тошқин оқибатида 7 киши ҳалок бўлганди. Шунингдек, Индонезияда кучли тошқин оқибатида 70 дан ортиқ одам вафот этганди.