АҚШ президенти Жо Байден маъмурияти бир қатор Яқин Шарқ мамлакатларидан Америка кучлари ва қуролларининг бир қисмини олиб чиқишни бошлади. Бу ҳақда «The Wall Street Journal» хабар берди.

Манбалар берган маълумотларга кўра, Қўшма Штатлар, хусусан, Ироқ, Кувайт, Иордания ва Саудия Арабистонидан олиб чиқиладиган «Patriot» зенит-ракета тизимларининг саккизта батареясини қайта жойлаштиради. Бундан ташқари, Саудия Арабистонидан THAAD (Terminal High Altitude Area Defense) ракетага қарши мудофаа тизимини ҳам қайтариб олади. Ушбу қуролларни ташишда фойладаланиладиган ҳарбий самолётларнинг бир қисми, шунингдек, юзлаб америкалик ҳарбийлар ҳам минтақадан кўчирилади.

Аниқлик киритилишича, Байден маъмуриятининг минтақадаги қуролли кучлар сонини кескин қисқартишига Хитой ва Россиянинг ҳаракатлари сабаб бўлган. Қайд этилишича, энг катта қисми Саудия Арабистонидан олиб чиқилаётган ҳарбийлар ҳамда қуроллар айнан Хитой ва Россия билан чегара ҳудудларга жойлаштирилади.

Келтирилишича, ҳарбийлар ҳамда қурол-яроғларни олиб чиқиш ва кўчириш 2021 йил июнь ойининг бошидаёқ бошланган. Пентагон раҳбари Ллойд Остин 2 июнь куни Саудия Арабистони валиаҳд шаҳзодаси Муҳаммад бин Салмон ал-Саудга Америка томонининг тегишли режалари тўғрисида хабар берган. 

Пентагон томонидан қайд этилишича, АҚШ ва Эрон ўртасида ҳарбий ҳаракатларнинг авж олиш хавфи камайган. Бундан ташқари, Америка томонининг фикрига кўра, Яқин Шарққа қурол узатилиши Эронни ва унинг назорати остидаги кучларни тўхтата олмаган. Бундан ташқари, Саудия Арабистони ўзининг мудофаа қобилиятини ҳам кучайтириб, ракеталарни мустақил равишда ушлаб қолиш қобилиятини намойиш этган.

«Бундан ташқари, Вашингтон АҚШнинг Яқин Шарққа жойлаштирилган ракеталарга қарши мудофаа тизимларининг баъзилари техник ва таъмирга муҳтож деб ҳисоблайди», дея қўшимча қилинган хабарда.

Аввалроқ АҚШ ҳарбийларини Афғонистонга қўшни мамлакатларга жойлаштириш масаласини муҳокама қилаётгани хабар берилган. Шунингдек, мамлакатлар ҳарбийлари 2020 йилда дунё бўйлаб тинч аҳолини ўлдирганини тан олгани маълум қилинганди.