Тошкент шаҳар Чилонзор туманида 15 июнь куни кореялик таэквондо мураббийи Ким Жин Юнг ўлдирилди. Ички ишлар вазирлиги матбуот котиби ҳолат юзасидан «Bugun.uz»га маълумот берди.

Хабарга кўра, 15 июнь куни соат тахминан 04:00 ларда 44 ёшли Жанубий Корея фуқароси К.Д. маст ҳолатда Чилонзор тумани Дўмбробод 4-тор кўчасида жойлашган уйларнинг бирида бўла туриб, шу ерда бўлган 40 ёшли юртдоши Ким Жин Юнг билан юзага келган келишмовчилик оқибатида ўткир тиғли жисмни Ж.Кимга қарата отган ва тан жароҳат етказган. Бунинг оқибатида Ж.Ким тан жароҳатлари билан Республика шошилинч тиббий ёрдам марказига олиб борилган.

Қайд этилишича, мазкур холат юзасидан Чилонзор тумани ИИО ФМБ Тергов бўлими томонидан К.Д.га нисбатан Жиноят кодексининг 104-моддаси 1-қисми (Қасддан баданга оғир шикаст етказиш) билан жиноят иши қўзғатилиб, процессуал тартибда ушланган.

Маълум қилинишича, 16 июнь куни куни жабрланувчи олган тан жароҳатлари сабабли вафот этган. Шу куни Д.К.га нисбатан Жиноят кодексининг 104-моддаси 3-қисми «д» банди билан айблов эълон қилиниб (Жабрланувчининг ўлишига сабаб бўлган қасддан баданга оғир шикаст етказиш), унга нисбатан «қамоққа олиш» тарзидаги эҳтиёт чораси қўлланилган.

Аввалроқ Самарқандда эркак танишига бир неча бор мих тиқиб ўлдиргани ва Наманганда 24 ёшли йигит дўконда сотувчини пичоқлагани хабар қилинган эди. Шунингдек, Бухорода мактаб ўқитувчиси маҳалладошини пичоқлагани маълум қилинган.