Ўзбекистонда 2021/2022 ўқув йили учун ОТМнинг бакалавриат таълим йўналишларига абитуриентларни онлайн рўйхатга олиш бошланди.

Хабарга кўра, бунда абитуриентлар:

• телефон рақамини авторизациядан ўтказиб, паспорт маълумотлари, доимий яшаш манзили ва тугатган таълим муассасаси бўйича маълумотларни киритиши;
• имтиёзлари мавжуд бўлса, уларни текшириши;
• чет тилидан миллий ёки халқаро сертификатга эга бўлса, сертификат маълумотларини киритиши керак.

Шунингдек, таълим йўналишларини 2021/2022 ўқув йили учун ОТМга ўқишга қабул қилишнинг давлат буюртмаси параметрлари белгиланиб, тиллар кесимида тасдиқланганидан сўнг танлаш мумкин бўлади. Рўйхатга олиш Давлат тест марказининг my.dtm.uz сайти ва Ягона интерактив давлат хизматлари портали орқали амалга оширилади.

Aбитуриентларни рўйхатдан ўтказиш 20 июлга қадар (20 июл куни ҳам) давом этади ҳамда улар ушбу муддатга қадар ўз маълумотларини ўзгартириши, чет тилидан миллий ёки халқаро сертификатга эга бўладиган бўлса, сертификат маълумотларини киритиши мумкин.

Аввалроқ Президент раҳбарлигида ўтказилган йиғилишда Ўзбекистонда 2021/2022 ўқув йили учун олий таълим муассасаларига ҳужжатларни онлайн қабул қилиш 20 июндан бошланиши ҳамда 2021 йилда олийгоҳларга қабул сони ўтган йилга нисбатан 13 фоизга оширилиб, 181 минг нафарга етказилиши хабар қилинган.

Шунингдек, Давлат тест маркази ахборот хизмати раҳбари иштирокидаги брифингда Ўзбекистонда 2021 йилдан ОТМ йўналишлари сонини чексиз танлаш мумкин ёки йўқлиги ҳақида маълумот берилган.