АҚШ Хитой ўз ҳудудига коронавируснинг келиб чиқишини ўрганмоқчи бўлган мутахассисларни киритмаса, унга қарши халқаро изоляция чораси кўрилишини айтди. Бу ҳақда АҚШ президентининг миллий хавфсизлик бўйича ёрдамчиси Жейк Салливан нутқига таяниб, Оқ уй хабар берди.

Маълум бўлишича, Салливан Байденнинг мамлакат расмийлари билан илгари коронавируснинг келиб чиққишини ўрганиш бўйича берган топшириғини эслаб, Хитой вируснинг манбасини аниқлашга қарши чиқса, унга қарши халқаро изоляция қўлланилишини айтган.

«Хитой масалага масъулият билан ёндашиб, шу тариқа терговчиларга вируснинг келиб чиқишини ўрганишга имкон беради ёки халқаро ҳамжамиятнинг изоляциясига дуч келади», — деган АҚШ президентининг миллий хавфсизлик бўйича ёрдамчиси.

Маълумот ўрнида, Байден олдинроқ Хитой ҳукумати Ухан вирусология институтига жаҳон ҳамжамияти учун кириш ҳуқуқини очиши кераклигини айтганди, шунингдек, коронавируснинг келиб чиқиши тўғрисида ҳали «хулоса қилмаганини» таъкидлаганди.

Аввалроқ олимлар коронавирус тарқалишидан олдин Ухан бозорларида кўршапалак сотилмаганини аниқлаганди. Шунингдек, коронавируснинг сунъий ишлаб чиқилгани ҳақида янги «далил» топилганди.