Президентнинг 19 июлдаги қарорига мувофиқ, Ўзбекистонда 6085 та кўп квартирали уй-жойлар мукаммал таъмирланади. Бу ҳақда Адлия вазирлиги ахборот хизмати хабар берди.

Маълум қилинишича, «Кўп квартирали уй-жойларни бошқариш тизимини янада такомиллаштириш тўғрисида»ги Президент қарори қабул қилинди. Унга кўра, 2022 йил 1 июлгача республикадаги:

• 1227 та кўп квартирали уй-жой;
• 30 та мактаб;
• 64 та мактабгача таълим ташкилотлари;
• 9 та ОТМ ва коллеж;
• 90 та автотураргоҳ;
• 173 та болалар майдончалари жойлашган ҳудудлар (жами 16 281 878 квадрат/метр майдон) очиқ танлов ўтказиш йўли билан бошқарувчи ташкилотларга бириктирилади.

Барча давлат буюртмачиларига танланган бошқарувчи ташкилот билан бириктирилган ҳудудда истисно тариқасида танлов ўтказмасдан коммунал ва авария вазиятларини бартараф этиш хизматларини кўрсатиш бўйича тўғридан-тўғри шартнома тузишга рухсат этилади.

Қарорга кўра, 2022–2025 йилларда:

• 6085 та кўп квартирали уй-жойлар мукаммал ва жорий таъмирланади;
• 1800 та болалар майдончаси қурилади ва таъмирланади;
• кўп квартирали уй-жойларга туташ 1102 минг квадрат/метр майдондаги йўлаклар бетонланади;
• 14 387 та ташқи ёритиш тизими таъмирланади. 

Шунингдек, эксплуатация муддатини ўтаб бўлган ва маънан эскирган жами 268 та кўп квартирали уй-жойлар реновация қилинади. Шундан 2021 йилда 211 та уй бузиб, қайта тикланади ҳамда 57 таси реконструкция қилинади. 

«2021 йил 1 июлдан ҳар бир кўп квартирали уй-жой учун мажбурий бадалларнинг ёки тўловларнинг алоҳида ҳисоби юритилиши шарт», дейилади хабарда.

Шу билан бирга, мулкдорлар ёки бошқарувчиларга кўп квартирали уй-жойларга туташ ер участкалари чегаралари ва ўлчамларини белгилаш ҳамда уларга доимий фойдаланиш ҳуқуқини белгиловчи зарур ҳужжатларни расмийлаштириш учун тўловларни бир йил давомида тенг улушларда бўлиб-бўлиб тўлашга рухсат этилади.

Бошқарувчилар бир йилда бир марта кўп квартирали уй-жойлардаги таянч ва тўсиқ конструкциялар (умумий мол-мулк) бутлигини хатловдан ўтказади.

Аввалроқ Ўзбекистонда кўп қаватли уйлар фойдаланишга берилганидан сўнг 2 йил қурувчи ташкилот бошқарувида бўлиши хабар қилинганди. Шунингдек, Ўзбекистонда 2021 йилда ипотека кредити асосида бериладиган уйлар икки бараварга кўпайтирилиши маълум қилинган.