Тошкентда «Premier Hall» кинотеатрининг янги дизайнини яратишда «Кокилли қиз» панноси сақлаб қолинади. Бу ҳақда Кинематография агентлиги ахборот хизмати «Bugun.uz»га маълум қилди.

Хабарга кўра, «Premier Hall» кинотеатрини таъмирлаш жараёнида бинонинг юзасида эски панно топилган. Ушбу бино 2021 йилда бўлиб ўтадиган «Ипак йўли дурдонаси» Тошкент Халқаро кинофестивали ўтказиладиган манзиллардан бири бўлиши кўзда тутилган. Шу сабаб Кинематография агентлиги ижарачилар билан келишган ҳолда бинонинг ташқи қиёфасини янгилаш бўйича қарор қилган. 

Экспертлар томонидан топилма ўрганилганида панно Алфред Мазитовнинг қаламига мансуб «Кокилли қиз» мозаика экани тасдиқланди. Рассомлар уюшмаси раиси Акмал Нур ва экспертлар паннони реставрация қилиш имкони мавжудлигини маълум қилган. Шундан келиб чиқиб, ушбу фрескани сақлаб қолган ҳолда бинонинг янги дизайнини айнан «Кокилли қиз»дан келиб чиқиб яратиш ҳақида хулосага келинган. 

Ҳозирда бинонинг ижарачилари ва қурувчилар билан қайта музокалар ўтказилиб, уларга янги дизайн бўйича кўрсатмалар берилган. Қайд этилишича, бунгача бинонинг дизайни умуман бошқача бўлиши ва топилган панно ўрнида фильмлар анонси учун экран ўрнатилиши режалаштирилган эди. Эндиликда бинонинг янги дизайнини яратишда айнан «Кокилли қиз» сақлаб қолиниб, унга кўра иш олиб борилади.

«Ушбу ўзгаришлардан сўнг бинонинг ҳозирги ‘Premier Hall’ номи қанчалик мос бўлиши бўйича саволлар туғилмоқда. Шу сабабдан шаҳар аҳолисидан таклифларни кутиб қоламиз», дейилади агентлик хабарида.

Аввалроқ Саида Мирзиёева пойтахтдаги панноларни сақлаб қолишга чақирган эди.